Denne van Knöldert en de burgermoeder

Ik ben burgermoeder, zei de vrouw an de oaverkaante van de workshopzaal woar völle luu van Plaatselijk Belang van kleine dorpen in Oaveriessel bie mekare waren. An haar kleding, hoardracht, brilmontuur en tassie had ik wel eschötten det wie hier niet te doene hadden met een hardwerkende vöarzitter van Plaatselijk Belang die d’r ok nog een bane noast hef.

Door Denne van Knöldert

Wie dachen in het zaaltie noa oaver wat ie zollen kunn’ doene met dorpskerken die löag komt te stoane. Det was best interessant. Vöaral ömdet de aanwezigen het hoofdzakelijk zöchen in kerkelijke activiteiten. Mar det is noe net de reden van löagstand.

Zelf had ik edacht an het huis van de duurzaamheid. Met de lokale voedselcoöperatie d’r in, ruumte vöar de voedselbank, een kennisplek vöar isolearen van oe huus, hoe ie zelf energie opwekt, kortom: zaken woarmee wie onze naaste helpt en de planeet redt.

Wat wul God nog mear.

Zie was de burgermoeder van Wierden en kwam öm te luusteren, zie wol haar mening oaver de toekomst van de kerken in haar gemeente niet zeng. Doar was ze burgermoeder vöar. Wat een stoethaspelaresse.

Ik dach het al wel: as ie oe burgermoeder goat nuum… Hoe dikke wul ie het er dan boa’m op leng. Een burgemeester is een burgemeester. Gin burgervader en al hillemoal gin burgermoeder. Een vrouwelijke Secretaris Generaal van de Verenigde Naties is toch ok nie iniens de Secretaresse Generaal?

En wat d’r mear van is: de moeder van de burgers… in plaatsen van gemoedelijke nabijheid creëer is juust ongemakkelijke ofstand. Pas op, doar kump de burgermoeder an, netties rechtop goan zitten! En denk d’r ömme, wie sprekt haar an met u!

Ik ging vrogger altied noar mien va en moe met vroang. Want as ik wusse hoe ze oaver dinge dachten, kon ik doar wieders oaver noa denken. Stel oe noe toch ‘ns vöar det Zus van Knöldert (Knöldert-moeder) altied ezegd had “ik luuster, ik geef gin mening.”

Een burgemeester is een burgermeester. Ientie met een mening. En van een politieke partieje. Die hef zien mening gewoon te gee’m, niet ömdet wie dan mut doene wat hij/zij zeg, mar ömdet het kaders gif.

En die mening geef ie al hillemoal as ie oe burgermoeder nuumt.

Het bericht Denne van Knöldert en de burgermoeder verscheen eerst op Opinie in Salland.


Het hele artikel is te lezen op www.Salland1.nl

Over Salland TV

x

Check Also

Theater a/d Rijn presenteert nieuwste generatie choreografen in MIMIK, Deventer

VIER x VIER toont vier korte dansperformances, los van het gebaande pad ...